mai roya pardes mai bheega maa ka pyaar,dukh ne dukh se baat ki bin chitthi bin taar
chota karke dekhiye jeevan ka vistaar,aankhon bhar aakash hai baahaon bhar sansaar
leke tan ke naap ko ghoome basti gaaon,har chaddar ke gher se bahar nikle paaon
sabki pooja eksi alag alag hai reet,masjid jaaye maulvi koyal gaaye geet
poojaghar mai moorti meera ke sang shyaam,jitni jiski chaakri utne uske daam
saatoon din bhagwaan ke kya mangal kyaa peer,jis din soye der tak bhookha rahe fakeer
achi sangat baith kar sangee badle roop,jaise mil kar aam se mithi ho gai dhoop
sapna jharna neend ka jagi aankhien pyaas,paana khona khojna saansoon ka itihaas
chahe geeta vaachiye ya padhiye quraan mera tera pyaar hi har pustak ka gyaan.
No comments:
Post a Comment